--------------------------------
மூணு பைசாவுக்கு
அஞ்சு மாங்கா பிஞ்சு !
சித்ரா பௌர்ணமியில்
கீரன் சொற்பொழிவு !
கோடை விடுமுறையில்
சைக்கிள் "ரிம்மின் "
டக்கர டக்கர !
ஓடியொளிந்த
தம்பி - தங்கைகளின்
ச்சீ..யொலிகள்..
பின்பான பாச அழைப்புகள்..!!
மூத்தவனின் தோள்வருடல்கள்...
தீபாவளி
கவுன்ட் டவுன் !
மழை பார்த்தல் !
போலீசு பயம் !
மாடி வீட்டு
சுதாவின்
கன்னம் பூசிய வெட்கம் !
காத்தாடி வெரீத்தல் !
அப்பாவின் கோபம் !
அம்மாவின்
சமையலறைப் பாடல் !
தூக்கில் தொங்கிய நண்பனை
உயிரோடு இறக்கி,
பெசன்ட் நகர்
கமலாக்கா
குடிசையில்
அடித்த
"சுண்டக்கஞ்சி " !
மேடைகள்,
பொன்னாடைகள்,
பாராட்டுக்கள் ..!!
மனைவியின் பிரசவ அலறல் !
குழந்தைகளின் மூத்திர வாசனை !
கடன் பாக்கி !
இன்னமும் வசூலாக வேண்டிய கடன் !
இதோ, இதோ, என்னை மோதிய
“லாரியின்”
கலர் ..!
இன்னும் என்னென்னமோ
இருக்கத்தான் இருக்கிறது
இன்னும் ..!!
........
யாரைக்
கேட்டு
"சங்கூதி " போகிறான் ..?
எனக்கு முன்னே ..?????
Sriram Sharma
No comments:
Post a Comment