பாலு சார்
செவிகளை மட்டும்
திறந்துகொண்டு
செவ்வாய்க் கோளுக்கும்
சென்றுவிடலாமே
பாலு சார்
உங்கள்
குரலேற்றிச் செல்லாத
பொன்வானம் ஏது
பாலு சார்
O
பாட்டை மட்டும்தானே
பாடவேண்டும்
பாலு சார்
பாட்டுக்குள் எப்படி
பயாஸ்கோப்பையே
காட்டினீர்கள்
பாலு சார்
O
முரட்டுச் சொற்களையும்
நாவடியில் வழுக்கிச் செல்லும்
அல்வாச் சொற்களாக்கிய
பாலு சார்
மெல்லிசைக்குப்
புதுப்பொருள் தந்து
வல்லினச் சொற்களையும்
மெல்லினமாக்கியதெப்படி
பாலு சார்
O
ஏதேனும் ஒரு பாடலை
எடுத்துப் போடலாம் என்று
தேடினேன் பாலு சார்
எல்லாப் பாடல்களுமே
என்னை விட்டுவிட முடியுமா
என்று கேட்கின்றன
பாலு சார்
O
காற்றுக்கு
வைர வைடூரிய
ஆபரணங்கள் அணிவித்த
பாலு சார்
பாதி வழியில்
உதிர்ந்து உடைந்த
முத்துமணி ஆனதேன்
பாலு சார்
O
இறந்தபின் உயிர்கள்
எங்கே போகுமோ
போகட்டும் பாலு சார்
ஆனால்
உங்கள் உயிர் மட்டும்
எங்களோடுதான்
சந்தனக் காற்றாக
பாலு சார்
அன்புடன் புகாரி
25 செப்டம்பர் 2020
No comments:
Post a Comment