மழை இரவு !
தூறலும் சாரலுமாக
முனகிக்கொண்டிருந்த தூவானம்...
ஓர்
உச்சகட்ட பிரசவ ஒலியோடு
அடைமழை யொன்றைப்
பிரசவித்து ஓய்ந்தது !
செவிக் கெட்டிய தொலைவில்
இடி இசைப்பதற்கு முன்னரே
மின்னலின் வெளிச்ச கீற்றொன்று
சாளர வெளியில்
மெர்க்குரி தெளித்தது!
மின்வெட்டு இரட்டிப்பாக்கிய
ஈர இருட்டில் நிலவிய
இதமான குளிர்
போர்வையின்
இண்டிடுக்குகளில்
விரல்கள் நுழைத்தது !
கொசுவலைக்கு உள்ளிருந்து
தூளிக் குழந்தையொன்று
யார் வீட்டிலோ அழத் துவங்க
சட்டென்று விழித்தாள்
ஓர் உம்மம்மா!
நூந்துபோன
முட்டை விளக்கை
மீண்டும் ஏற்ற...
இரவின்மீது
மஞ்சள் துப்பட்டா !
மழையைச் சேமித்த செடிகொடிகள்
இலைகள் வழியாக
பினாமி மழையாக
இன்னும்
சொட்டிக் கொண்டிருந்தது !
கேட்கும் தூரத்தில்
தவளையொன்று
சொந்த செலவில்
சூனியம் வைத்துக் கொண்டிருந்தது !
தொண்டை செறுமல்களிலும்
ரப்பர் செருப்புகள் நீர் மிதிக்கும் ஓசையிலும்
இரவு
பலவீனப்படுவதை உறுதிசெய்துகொண்ட
விடியல்...
கண்கசக்கிக் கொண்டிருந்தது !
ஒற்றையடிப் பாதைகளை
ஓடைகளாக்கியும்...
தார்ச் சாலைகளுக்கு
நகராட்சி துப்புரவுத்தொழிலாளராகவும்...
மண் பாதை கழிவுகளையும்
காலடித் தடங்களையும்
கழுவி வைத்தும்...
காலையில்
புத்தம் புது பூமியொன்றை
படைத்துவைத்து ஓய்ந்தது
மழை இரவு !
No comments:
Post a Comment