பாபா
பழனி பாபா -
இமைகளின் மீது
இருள்
இறக்கி வைக்கப்பட்ட
ஒரு சமுதாயத்தின்
விழி திறக்க வந்த
வெளிச்ச விடியல் !
௦௦௦
கிழக்குகள் ஊட்டிய
போலிக் கரிசன மதுவிலும்
வடக்குகள் ஊற்றிய
வஞ்சகக் கூழிலும்
காவிகள் கொட்டிய
வெஞ்சினத்
திராவக வெறியிலும்
வாடிக் கிடந்த
பிறைப் பயிர்களை
தடை கிழித்து வந்து
தலை நிமிர்த்தி வைத்த
மேற்குச் சூரியன் !
௦௦௦
நசுக்கப்பட்டும்
நெரிக்கப்பட்டும்
காற்றைத்தேடிக்
கைவீசிக் கொண்டிருந்த
குரல்வளைகளுக்கு
ஊமை சிறை உடைத்து
சுதந்திர சுவாசம் தந்த
உரிமைப் போராளி !
௦௦௦
அவன் பேசினான் -
மேடைகள்
பட்டறைகளானது !
அவன் தீட்டிய
சொல்லரிவாள்களின் முன்னே
மரண வியாபாரிகளின்
கொலை அருவாள்கள்
முனை முறிந்து விழுந்தன !
௦௦௦௦
இடி
மின்னல்
மழை என
பகை மேகம் கிழித்து
களம் இறங்கிய
அவன் வேகம் கண்டு
அரவக் குஞ்சுகளாய்
அரண்டு நின்றது
கணவாய்தாண்டி வந்த
கள்வர் கூட்டம் !
௦௦௦
தட்டி எழுப்பவும்
தட்டிக் கேட்கவும்
தணலாக வந்த
தலைவனைக் கண்டு
தரணிக்கே
தன்மானம் வந்தது !
ஒடுக்கப்பட்ட இனத்தின்
குருதி குடித்தே
கொழுத்துத் திரிந்த
நூலறுந்த நரிகளுக்கு
அவமானத்தால்
முகம் வெந்தது !
அகம் நொந்தது !
௦௦௦
மானத்திற்கும்
அவமானத்திற்கும்
வேற்றுமைத் தெரியாத
இழி பிறவிகளின்
இருட்டறைகள்
சதிமானங்களின்
"சங்"கமமானது !
ஒரு சகாப்தத்தை
சத்தமில்லாமல் ஆக்கும்
சகுநித்தனங்கள்
அங்கேதான்
"சிண்டு" கட்டிக் கொண்டது !
௦௦௦
பத்தினித் தாய் மார்பில்
பால் குடித்து
உடல் வளர்ந்த
உத்தமனின் உடலுக்கு
வெட்டுக்கள்
பதினெட்டு !
௦௦௦
நாய்ப்பால் குடித்து வந்த
பேய் மகன் வீசிய
கோடரி வீச்சில்
கோமகன்
குடல் சரிந்தது !
அகம் அதில்
ஈமானைச் சுமந்த
அஹமது அலி என்னும்
வேங்கைப் புலி
மண்ணில் சாய்ந்தது !
௦௦௦
இனி எப்போதும்
சாய்க்க முடியாத
வரலாற்றின்
வாரிசுகளாக
அவன்
விதைத்துச் சென்ற
வீரத்தின்
வித்துக்களுக்கு
ஒருநாளும் இனி
சாக்காடில்லை என்பது
மதவெறி
நோக்காடுகளுக்குத்
தெரியவில்லை !
௦௦௦
வீரர்கள்
வீழ்த்தப்படும்போதுதான்
வாழவே ஆரம்பிக்கிறார்கள் !
வீழ்ந்து கிடந்த
ஒரு சமுதாயம்
ஆளும் வழிகளை
வகுத்துக்காட்டி
பாபா
வாழ்ந்து கொண்டிருக்கிறார்
வரலாற்றின் பொன்னேடுகளில் !
@ எவ்வளவோ கவிதைகள்
எழுதி இருக்கிறேன்.
எழுதிக் கொண்டுமிருக்கிறேன்.
இது போன்று நான் எழுதிய
பழைய கவிதைகளை
மீண்டும் படிக்கும்போது
சிலிர்த்துப் போகிறேன்.
பழனிபாபாவுக்கு
ஷஹீதுகளுடைய அந்தஸ்தை
வல்ல இறைவன் வழங்குவானாக !
No comments:
Post a Comment