தூக்கத்தின் சிறகுகள் #நிஷாமன்சூர்

1.
உன் புன்னகைக்கும்
ஒரு கோப்பைத் தேநீருக்கும்
நடுவில்
நிகழ்வுகள் ஸ்தம்பிக்குமொரு
சிறு மரணம்,
தூக்கம்.
2.
முட்டைகளின் மீது அடைகாக்க அமரும்
தாய்க்கோழியின் ஆதுரத்துடன்
தூக்கத்தின் வெம்மையான சிறகுகள்
என் இரவுகளின் மீது போர்வையாகின்றன.
3.
தலைக்கு மேலே
மழைபொழியக் காத்திருக்கும்
கார்மேகம் போல
என்மீது
கவிந்தரவணைத்துக் கொள்ளக்
காத்திருக்கிறது,
தூக்கம்.

நிஷா மன்சூர்