Friday, January 13, 2017

திருமணம் என்பது ஓர் ஒப்பந்தம்

திருமணம் என்பது
ஓர் ஒப்பந்தம்
சொர்க்கத்தை
மண்ணில் காணவும்
நரகத்தை
நாட்களிலிருந்தும்
நெஞ்சினின்றும்
விலக்கிவைக்கவும்
திருமணம் என்பது
ஓர் ஒப்பந்தம்

இதயங்களின் ஈர்ப்புகளிலோ
இதழ்களின் தவிப்புகளிலோ
இன்பமாய் வாழ
இனிமையாய் வாழ
திருமணம் என்பது
ஓர் ஒப்பந்தம்
நரகத்தை
மண்ணில் கண்டுவிட்டால்
சொர்க்கம்
நாட்களிலிருந்தும் நெஞ்சினின்றும்
விலகிப் போய்விட்டால்
ஒப்பந்தம் என்பது
தானே முறிந்து
அதன் தலை தொங்கிவிடுகிறது
திருமணம்
சொர்க்கத்தில்
நிச்சயக்கப்பட்டதல்ல
ஏனெனில்
கண்ணில் காணும்
இத்தனை நரகத்தையும்
சொர்க்கமா
நிச்சயித்திருக்க முடியும்
திருமணம் என்பது
ஆயிரம் காலத்துப் பயிர்
என்பதும் பிழை
இன்பத்தின் ஆயுள்
எத்தனை எத்தனை மணநிலங்களில்
காய்ந்து கருகி உதிர்ந்து
சாம்பலாய்க் கிடக்கின்றன
திருமணம் என்பது
ஓர் ஒப்பந்தம்
நீ விரும்புகிறாய்
நான் விரும்புகிறேன்
இதோ சொர்க்கம்
நீ வெறுக்கிறாய்
நான் வெறுக்கிறேன்
அது நரகமல்லவா
இந்த வாழ்க்கை
ஒரே ஒரு முறைதான்
அதை
வாழாமல் போனால்
போனதுதான்
இந்த உயிர்
எந்த உத்திரவாதத்திற்கும்
கட்டுப்படுமா
வருடங்களா நாட்களா
நிமிடங்களா நொடிகளா
சொல்லமுடியுமா
இதனுள்
மல்யுத்தம் வேண்டுமா
கயிறிழுத்தல் வேண்டுமா
துரோகங்கள் வேண்டுமா
காயங்கள் வேண்டுமா
கண்ணீரில்
கரைதல்தான் வேண்டுமா
அன்பு அல்லவா
வேண்டும்
காதல் அல்லவா
வேண்டும்
காதல் என்பது
ஓர் அற்புதப் பயிர்
இறுக்கிக் கட்டும்
கட்டுகளுக்குள்
காதல்
காந்துபோய்விடுகிறது
அன்பில் கட்டும்
நட்பில் கட்டும்
ஈர்ப்பில் கட்டும்
பிணைப்புக் கட்டுகளுக்குள்
காதல் செழித்து வளரும்
கல்யாணம் நீடித்து நிற்கும்
திருமணம் என்பது
ஓர் ஒப்பந்தம்
அன்புடன் புகாரி

No comments:

LinkWithin

Related Posts with Thumbnails