சொர்க்கமென்று தெரியாதவன் ...

சொர்க்கமென்று தெரியாதவன் ...

*****

அல்லாஹ் எனக்குத் தந்த

பேரருளே

என் உம்மாதான்!(அம்மா)

(உம்மா என்றால் கர்ப்பம் தரித்து பத்து மாதங்கள் சுமந்து பெற்றெடுத்து தாய்ப்பால் தந்து வளர்த்த தாய் )

***

உம்மா முகத்தில்தான்

எத்தனை அமைதி...

எத்தனை சாந்தம்!

***

முக்காடு நீங்காதா உம்மா

வீட்டு மேகத்துக்குள்

மூடிக் கிடந்த

முழு நிலா!

***

முஹம்மதரின்

உம்மத்தாயிருந்ததில்

அர்த்தமுள்ள ஆச்சரியம் என் உம்மா!

***


பெருமானாரின் உம்மாப் பெயரே

என் உம்மாவுக்கும்..

ஆமினா உம்மா!

உம்மாவின் தாயார் பெயர்

கதீஜா!

உம்மாவின் வாப்பா பெயர்

நைனா முஹம்மது!

உம்மாவின் வாழ்க்கையில்

வசந்தமாய் வந்த

என் வாப்பாவின் பெயரோ...

பக்கீர் முஹம்மது!

***

ஒரு பெண் குழந்தைக்கு

ஆசைப்பட்ட

உம்மா....

ஆசை ஆசையாய்

ஆறு பிள்ளை பெற்றாள்!

ஆறும் ஆண் பிள்ளை!

***

தஸ்பீஹ் மாலையில்

மணிகளை கோர்த்ததுபோல்

பிள்ளைகளுக்கு பெயரிட்டாள்

உம்மா!

***

ஹபீபுல்லாஹ்

ரஹீமுல்லாஹ்

கரீமுல்லாஹ்

அதாவுல்லாஹ்

நஜீமுல்லாஹ்

சைபுல்லாஹ்

அல்லாஹ்வின் பெயர்களைக் கொண்டே

பிள்ளைத் தமிழ் எழுதிய

உம்மாதான்

என் தமிழ் ஆசான் !

***

இரக்கம் ...

உம்மாவின் கூடப் பிறந்த குணம்

பசித்தோர் தேடிவந்தால் மட்டுமல்ல...

தேடித் பிடித்தும்

பசி தீர்க்கும் சீமாட்டி...

வீட்டையே

யாகசாலையாக ஆக்கி

ஆக்கிப் போட்டு ஆக்கிப் போட்டு

ஆனந்தம் கொண்ட பெருமாட்டி!

***

எத்தனையோ குமர்களுக்கு

மணமுடித்து வைத்து

மகளில்லாத மனக்குறையை

விரட்டிவிட்டு

மன நிறைவானவள் உம்மா!

***

உம்மாவின் நகைகளிலெல்லாம்

எனக்குப் பிடித்தது

எப்போதும் மாறாத

அந்த புன்னகைதான்!

***

சுகவீனம் வந்தாலும்

முகம் சுளிக்காத சீதேவி...

இன்பத்திலும் துன்பத்திலும்

சிந்தை மாறாத ஈமான்தாரி !

***

கால் வலிக்கும் போதெல்லாம்

இதமாகப் பிடித்து விடுவேன்..

கொஞ்ச நேரத்திலேயே

"போதும்..போ .."என்பாள்

காரணம் கேட்டால்

"உனக்கு கை வலிக்கும் " என்பாள்!

***

சிறு பிள்ளை எனக்கு

அன்றைக்குத்

தெரியாமல் போய் விட்டது...

நான் பணிவிடை செய்தது

"சொர்க்கத்தின் பாதத்திற்கென்று"

அபூஹாஷிமா வாவர் 
அபூஹாஷிமா வாவர்
கண்மணிகள்..>
பேத்தி ...... >
ஹனியா

பேரன் ....... ரசீன் >