புதுப்பொலிவைத் தருக
புதியதொரு ஆண்டு
பிறக்கட்டும் நாளை
சந்தோஷக் கதவுகளைத்
திறக்கட்டும் காலை
மக்களை நேசிக்கும் அரசு
நாட்டில் மலரட்டும்
மணக்காத மலர்களெல்லாம்
மண்ணில் வாடி உலரட்டும்
மாட்டைக் காட்டி
மனிதனைக் கொல்லும் நாடு
இனி வேண்டாம் என்று
புதிய கீதம் பாடு
இன மதிப்பும் பணமதிப்பும்
கூடிக்கொண்டே போகின்ற
புதிய ஆண்டு பிறக்கட்டும்
சுதந்திரக் கதவுகள் திறக்கட்டும்
சிறுமிகளைக் குறிவைக்கும்
சிந்தனைகள் அத்தனையும்
அடுத்து வரும் புத்தாண்டில்
அழுகி நாறிப்போகட்டும்
அப்பாவி மக்களது
அழகான நெற்றிகளை
துப்பாக்கியால் துளைத்திட்ட
துஷ்டர்கள் தொலையட்டும்
ஆடு நனைவதற்காக
அழுகின்ற ஓநாய்கள்
அடுத்து வரும் ஆண்டுதனில்
அழிந்தொழிந்து போகட்டும்
மக்களது வரிப்பணத்தில்
மானங்கெட்டுப் பறக்கின்ற
தருதலைகள் வீழட்டும்
தலைதெறிக்க ஓடட்டும்
கோடிக்கணக்கில் கடன் வாங்கி
ஓடிப்போய் வெளிநாட்டில்
ஒளிந்துகொள்ளும் முதலைகள்
ஒருசேர ஒழியட்டும்
இந்து முஸ்லிம் கிறிஸ்தவர் என
சிந்தனைகள் வேறுபட்டாலும்
சிந்துவின் மக்கள் யாரும்
சகோதரர்களே என
சேர்த்திடட்டும் புத்தாண்டு
வந்துபோன வேதனைகளை
மறந்திடுவோம்
சாதனையின் கதவுகளைத்
திறந்திடுவோம்
Nagore Rumi
No comments:
Post a Comment