அன்றொருநாள்
என் காதுக்குள் குடிபுகுந்து
எனக்குப் பயம் என்றாள்
கிசுகிசுப்பாக
பயமா
உனக்கா
ஏன் என்றேன்
கண்ணில் படாதவன்
கணினி வழி வந்து
பின் கழுத்தில் முத்தமிட்டால்....?
பயம்தானே தோன்றும் என்றாள்
கண்களைக் கண்ணிமைகள்
கணக்கின்றி முத்தமிட்டுச் சிவக்க
ஓ... அந்த பயமா
இது பெண்ணின்
அந்தரங்க பயமாயிற்றே
நாணத்திற்கும் சிலிர்ப்புக்கும்
இடைப்பட்டது
சரியா
வேண்டாம் என்றல்ல
கிளர்ச்சித் தீண்டல் வேண்டும் என்னும்
வெட்க வெளிப்பாட்டுப்
பயம்தானே என்றேன்
கமுக்கமாய்ச்
சிரித்தாள் சித்தாரக் கள்ளி
தொகுப்பு: காதலிக்கிறேன்
No comments:
Post a Comment